Nazirlik xüsusi təyinatlı avtomobillərin hərəkətinə mane olmamağa çağırıb
Elpress.az xəbər verir ki, Fövqəladə Hallar Nazirliyi şəhər yollarında yaranan sıxlıqla əlaqədar avtomobil sürücülərinə müraciət edib.Nazirlikdən bildirilib ki, yay istirahət mövsümünün başa çatması və yeni tədris ilinin başlaması ilə əlaqədar şəhərdaxili yollarda nəqliyyat sıxlığı artıb. Bu vəziyyət yanğınsöndürən və xilasetmə avtomobillərinin fövqəladə hadisə ünvanlarına vaxtında çatmasına çətinlik yaradır.Xüsusilə bəzi sürücülərin hadisə yerinə hərəkət edən xüsusi təyinatlı nəqliyyat vasitələrinə yol verməməsi yanğın, qəza və digər fövqəladə halların nəticələrinin operativ şəkildə aradan qaldırılmasına mane olur.FHN sürücüləri yollarda hərəkət edən yanğınsöndürən və xilasetmə avtomobillərinə dərhal yol verməyə çağırıb.Qeyd olunub ki, xüsusi təyinatlı nəqliyyat vasitələrinə yol verməyən sürücülər qanunvericiliklə müəyyən edilmiş məsuliyyət daşıyırlar. Belə hallarda fövqəladə hadisə yerinə vaxtında çatmaq və təhlükədə olan insanların həyatını xilas etmək üçün görülən tədbirlər də çətinləşir.
