Azərbaycanın faydalı bitkilərinin elmi tədqiqi və tətbiq sahələrinə həsr olunan “Azərbaycanın faydalı bitki ehtiyatları: tədqiqi və tətbiqi” kitabının birinci cildi nəşr edilib.
Azərbaycanın zəngin flora irsinin öyrənilməsi istiqamətində mühüm elmi nəşrlərdən biri olan “Azərbaycanın faydalı bitki ehtiyatları: tədqiqi və tətbiqi” kitabının I cildi çapdan çıxıb. Fundamental elmi əsər ölkənin faydalı bitkilərinin elmi təsnifatı, tarixi inkişafı və müxtəlif sahələrdə tətbiqinin geniş araşdırılmasına həsr olunub.Nəşrdə bitki növlərinin ilk dəfə kimlər tərəfindən adlandırıldığı, həmin dövrdə istifadə olunan sistematik prinsiplər və bu adların müasir botanika elmindəki əhəmiyyəti ətraflı şəkildə izah edilir. Eyni zamanda, bitkilərin etnobotaniki, farmakoloji və ekoloji xüsusiyyətləri tarixi mənbələr əsasında təhlil olunur, onların qədim dövrlərdən bu günədək istifadə istiqamətlərində baş verən elmi yeniliklər oxuculara təqdim edilir.Kitabın diqqətçəkən məqamlarından biri də burada yer alan bitki növlərinin əksəriyyətinin fitokimyəvi tərkibinin müəlliflər tərəfindən tədqiq olunaraq işlənilməsidir. Bundan əlavə, nəşrdə latın terminologiyasının bitki növlərinin adlandırılmasındakı rolu, növ təsvirlərinin hazırlanma prinsipləri və bu proseslərin müasir taksonomiyanın inkişafına təsiri elmi əsaslarla izah olunur.Mütəxəssislərin fikrincə, nəşr botanika, ekologiya, fitokimya, kənd təsərrüfatı və digər elmi istiqamətlər üzrə çalışan tədqiqatçılar üçün dəyərli mənbə olmaqla yanaşı, tələbələr, ekspertlər və bitkilərin tarixi, xüsusiyyətləri və istifadəsi ilə maraqlanan oxucular üçün də faydalı elmi vəsait hesab edilir.Kitabın elmi redaktoru professor Səyyarə İbadullayeva, rəyçiləri isə akademik Tariyel Talıbov və professor Aydın Əsgərovdur. Nəşrin müəllifləri professor Səyyarə İbadullayeva, dosent Ramiz Ələkbərov, dosent Gülnarə Şirəliyeva, biologiya üzrə fəlsəfə doktoru Samirə Xudaverdiyeva, doktorant Venera Əhmədova və Ədliyyə Nazirliyinin Məhkəmə Ekspertiza Mərkəzinin böyük eksperti Pərvanə Rüstəmovadır.
