Elpress.az xəbər verir ki, “TikTok” istifadəçisi İlduzə Hacıyeva barəsində məhkəmə hökmü çıxarıldıqdan sonra qəzada həyatını itirən Amal Məlikovun ailəsi məsələ ilə bağlı açıqlama yayıb.
Mərhumun bacısı sosial şəbəkədə paylaşdığı açıqlamada ailə ilə barışıq əldə olunmasına yönəlmiş cəhdlərin nəticəsiz qalacağını bildirib. Onun sözlərinə görə, son günlər müxtəlif şəxslər ailə üzvləri ilə əlaqə saxlamağa, evlərinə gələrək barışıq üçün vasitəçilik etməyə çalışırlar.
Ailə üzvü qeyd edib ki, baş verən faciədən sonra mərhumun yaxınlarına qarşı səsləndirilən təhqirlərdən sonra hər hansı barışıqdan söhbət gedə bilməz və bu məsələ qəti şəkildə gündəmdə deyil.
O, həmçinin məhkəmənin təyin etdiyi cəzanın yüngül hesab edildiyini vurğulayaraq, yaxın günlərdə hökmün ağırlaşdırılması tələbi ilə Bakı Apellyasiya Məhkəməsinə müraciət edəcəklərini bildirib.
Qeyd edək ki, məhkəmənin hökmünə əsasən, İlduzə Hacıyeva cəzasını ümumi rejimli cəzaçəkmə müəssisəsində çəkmək şərti ilə 5 il 2 ay müddətinə azadlıqdan məhrum edilib və hökm elan olunduqdan sonra məhkəmə zalında həbs edilib.
