Diasporla İş üzrə Dövlət Komitəsinin sədri İƏT ölkələrinin diaspor qurumları arasında əlaqələrin gücləndirilməsinin vacibliyini vurğulayıb
Elpress.az xəbər verir ki, Azərbaycan diaspor siyasətinin inkişaf etdirilməsi və xaricdə yaşayan soydaşlarla əlaqələrin möhkəmləndirilməsi istiqamətində İslam Əməkdaşlıq Təşkilatına üzv ölkələrlə əməkdaşlığın genişləndirilməsinə tərəfdardır.Diasporla İş üzrə Dövlət Komitəsinin sədri Fuad Muradov Ankarada keçirilən İƏT-ə üzv ölkələrin müsəlman diasporlarının I Forumuna müraciətində bildirib ki, diasporların fəaliyyəti yalnız tarixi vətənin maraqlarının müdafiəsi ilə məhdudlaşmır. Onun sözlərinə görə, diaspor icmaları müxtəlif ölkələr və xalqlar arasında əlaqələndirici rol oynayır, yaşadıqları cəmiyyətlərin sosial, iqtisadi, elmi və mədəni inkişafına töhfə verirlər.F.Muradov qeyd edib ki, müasir diaspor siyasətinin əsas istiqamətlərindən biri xaricdə yaşayan soydaşların bilik və təcrübəsindən səmərəli istifadə etmək, onların Azərbaycanla əlaqələrini daha da gücləndirmək və yeni əməkdaşlıq imkanları yaratmaqdır.Komitə rəhbəri bildirib ki, gənc diaspor nümayəndələri ilə iş də xüsusi əhəmiyyət daşıyır. Yay düşərgələri, dil məktəbləri və digər layihələrin gənc nəslin milli kimliyini, dilini və mədəni irsini qorumasına, eləcə də Azərbaycanla bağlarının möhkəmlənməsinə xidmət etdiyi vurğulanıb.Onun sözlərinə görə, diskriminasiya və stereotiplərlə mübarizə, milli kimliyin və mədəni irsin qorunması, gənclərin tarixi Vətənlə əlaqələrinin saxlanılması, həmçinin onların yaşadıqları cəmiyyətlərə uğurlu inteqrasiyası daim diqqətdə saxlanılmalıdır.Fuad Muradov İƏT ölkələrinin diasporlarının mövcud imkanlardan birgə istifadə etməklə yanaşı, qarşılaşdıqları ümumi problemlərin həlli istiqamətində də əməkdaşlıq edə biləcəyini bildirib. O, keçirilən forumun gələcəkdə İƏT məkanında diaspor məsələləri üzrə fəaliyyət göstərən qurumlar arasında davamlı və səmərəli əlaqələrin formalaşmasına təkan verəcəyinə ümid etdiyini qeyd edib.
