ABŞ-ın Boston şəhərində yerləşən tarixi “Jordan Hall” konsert salonunda azərbaycanlı opera ifaçısı Emin İsmayılov uğurlu çıxışı ilə diqqət mərkəzinə düşüb.
Elpress.az xəbər verir ki, Boston Festival Orkestrinin müşayiəti ilə bəstəkar Kristofer Tinin “The Drop That Contained the Sea” vokal-simfonik əsəri təqdim olunub.
Əsərin Yunus Əmrənin sözlərinə bəstələnmiş və türk dilində səslənən “Haktan Gelen Şerbeti” hissəsinin solo partiyasını azərbaycanlı tenor Emin İsmayılov ifa edib.Hazırda ABŞ-da təhsilini davam etdirən gənc sənətçinin peşəkar və təsirli ifası tamaşaçılar tərəfindən sürəkli alqışlarla qarşılanıb.
Musiqi layihəsində türk dilində səslənən hissənin məhz azərbaycanlı ifaçı tərəfindən təqdim edilməsi Azərbaycan vokal sənətinin beynəlxalq arenadakı növbəti uğuru kimi dəyərləndirilir.
Qeyd edək ki, Üzeyir Hacıbəyli adına Bakı Musiqi Akademiyasının məzunu olan Emin İsmayılov Azərbaycan Dövlət Akademik Opera və Balet Teatrının dəvətli solisti kimi fəaliyyət göstərib. O, Almaniyanın “İmmling” Beynəlxalq Opera Festivalı və digər nüfuzlu beynəlxalq musiqi layihələrində də Azərbaycanı uğurla təmsil edib.
