Pavel Radomski: Azərbaycan-Polşa münasibətləri çox yaxşı vəziyyətdədir
Elpress.az xəbər verir ki, Polşanın Azərbaycandakı səfiri Pavel Radomski mediada yayılan bəzi materiallar və yaşanan insidentlərin iki ölkə arasındakı münasibətlərə təsir etməyəcəyini bildirib.Diplomat bunu diplomatik korpusun Qarabağ və Şərqi Zəngəzura səfəri zamanı deyib. O, Azərbaycan-Polşa münasibətlərinin hazırda çox yaxşı vəziyyətdə olduğunu və tərəflər arasında davamlı dialoqun mövcudluğunu qeyd edib.Səfirin sözlərinə görə, iki ölkə arasında ikitərəfli əməkdaşlığın inkişafını izləmək üçün müvafiq mexanizm fəaliyyət göstərir və gələcək əməkdaşlığın genişləndirilməsi ilə bağlı planlar mövcuddur.Pavel Radomski Qarabağa səfəri barədə təəssüratlarını da bölüşüb. O bildirib ki, bu, onun bölgəyə dördüncü səfəridir və əvvəlki səfərlərlə müqayisədə azad edilmiş ərazilərdə aparılan bərpa, yenidənqurma və modernləşdirmə işlərində böyük irəliləyiş müşahidə olunur.Diplomat Şuşanın bərpa olunmuş vəziyyətinin, eləcə də Qarabağın təbiətinin onda xüsusi təəssürat yaratdığını vurğulayıb.O, Polşa mediasında Azərbaycana qarşı yayılan bəzi iddialara münasibət bildirərkən belə hallara yalnız “insident” kimi yanaşılmasının vacibliyini qeyd edib və onların ikitərəfli əlaqələrə təsir göstərməyəcəyinə əmin olduğunu deyib.
