Bakıda teatr, musiqi, balet və vizual sənəti bir araya gətirən ikinci Beynəlxalq İncəsənət Festivalı başlayır. Oktyabrın 28-dən noyabrın 8-dək davam edəcək BIAF-2026 çərçivəsində müxtəlif ölkələrdən sənətçilər paytaxtın mədəniyyət məkanlarında çıxış edəcəklər.
Elpress.az xəbər verir ki, Heydər Əliyev Fondunun və Mədəniyyət Nazirliyinin dəstəyi ilə təşkil olunan festivalın proqramına 20-dən çox tədbir daxildir. Konsertlər, teatr tamaşaları, balet, film nümayişləri və sənətçilərlə görüşlər festivalın əsas istiqamətlərini təşkil edir.
Builki proqramın diqqətçəkən məqamlarından biri dünya şöhrətli xoreoqraf Əkrəm Xanın “Thikra: Night of Remembering” əsəridir. Tamaşada klassik hind rəqsi katakla müasir rəqsin elementləri birləşdirilir. Vizual həlləri səudiyyəli rəssam Mənal Əl-Dovayanın hazırladığı əsər yaddaş, kollektiv xatirə və ənənələr mövzularını önə çıxarır.
Festivalın musiqi proqramı bəstəkar Dmitri Şostakoviçin 120 illiyinə həsr olunub. Tədbirlər sırasında skripkaçı Maksim Vengerovun Azərbaycan Dövlət Simfonik Orkestri ilə çıxışı da var. Noyabrın 8-də Müslüm Maqomayev adına Azərbaycan Dövlət Filarmoniyasında keçiriləcək yekun konsertdə Şostakoviç və Rimski-Korsakovun əsərləri səsləndiriləcək.
Festivalın digər mühüm istiqaməti beynəlxalq sənətçilərlə yerli yaradıcı kollektivlər arasında əməkdaşlıqdır. Proqramda Azərbaycan Dövlət Akademik Opera və Balet Teatrının və Bakı Xoreoqrafiya Akademiyasının nümayəndələrinin iştirakı ilə birgə layihələr də nəzərdə tutulub.
Tədbirlər Müslüm Maqomayev adına Azərbaycan Dövlət Akademik Filarmoniyası, Heydər Əliyev Sarayı, Azərbaycan Milli Dram Teatrı və digər mədəniyyət məkanlarında keçiriləcək. Festivalın tam proqramı və biletlərlə bağlı məlumatı əldə etmək mümkündür.
