Dövlət xidmətlərindən istifadə edən şəxslərə zəruri sənədlərin və məlumatların təqdim edilməməsinə görə vəzifəli şəxslərin cərimələnməsi təklif olunur.
Elpress.az xəbər verir ki, məsələ İnzibati Xətalar Məcəlləsinə dəyişikliklərlə bağlı qanun layihəsində əksini tapıb. Layihə Milli Məclisin Hüquq siyasəti və dövlət quruculuğu komitəsinin oktyabrın 27-də keçirilən iclasında müzakirə olunub.
Təklifə əsasən, dövlət xidmətlərindən istifadə edən şəxsin müraciəti üzrə inzibati aktın, texniki sənədin və ya digər hüquqi əhəmiyyətli sənədin təqdim edilməməsinə, eləcə də zəruri məlumatın verilməməsinə görə vəzifəli şəxslər 550–650 manat məbləğində cərimələnə bilər.
Layihədə digər pozuntulara görə də maliyyə sanksiyaları nəzərdə tutulur. Dövlət xidmətlərinin qaydaları barədə məlumat verilməməsinə görə 350–450 manat, elektron ödəniş imkanının təmin edilməməsinə görə 450–550 manat cərimə təklif olunur.
Dövlət xidmətindən imtinanın və ya xidmətin dayandırılmasının hüquqi əsasları, eləcə də şikayət etmək hüququ barədə məlumat verilməməsinə görə isə cərimənin 650–750 manat olması nəzərdə tutulur. Əlilliyi olan şəxslərin xidmətlərdən istifadəsi üçün şərait yaradılmaması da ayrıca pozuntu kimi müəyyənləşdirilir.
Qeyd edək ki, söhbət hazırda qanun layihəsində təklif edilən dəyişikliklərdən gedir. Bu cərimələr qüvvədə olan qanun kimi təqdim edilməməlidir.
