Özbəkistan Respublikasının Baş prokuroru Niqmatilla Yuldoşevin rəhbərlik etdiyi nümayəndə heyəti Azərbaycanda işgüzar səfərdədir.
Elpress.az xəbər verir ki, səfər çərçivəsində keçirilən görüşdə iki ölkənin prokurorluq orqanları arasında hüquqi əməkdaşlığın daha da genişləndirilməsi, prokurorluq əməkdaşlarının peşə hazırlığı və təcrübə mübadiləsinin gücləndirilməsi məsələləri müzakirə olunub.
Görüş zamanı Azərbaycan Respublikası Baş Prokurorluğu ilə Özbəkistan Respublikası Baş Prokurorluğu arasında 2027–2028-ci illəri əhatə edən Əməkdaşlıq Proqramı imzalanıb. Sənəd qarşılıqlı səfərlərin, birgə təlimlərin, ekspert mübadiləsinin və beynəlxalq təşkilatlar çərçivəsində koordinasiyalı fəaliyyətin genişləndirilməsini nəzərdə tutur. Özbəkistanın Baş prokuroru Niqmatilla Yuldoşev göstərilən qonaqpərvərliyə görə təşəkkür edərək, Azərbaycan Prokurorluğu ilə qarşılıqlı etimada əsaslanan əməkdaşlığın inkişafına xüsusi önəm verdiklərini və əlaqələrin bundan sonra da yüksələn xətt üzrə davam etdirilməsi üçün bütün zəruri addımların atılacağını bildirib.Səfər çərçivəsində Azərbaycan və Özbəkistan prokurorluq orqanları arasında əməkdaşlığın inkişafına verdiyi töhfələrə görə Niqmatilla Yuldoşevə “Azərbaycan Prokurorluğunun 100 illiyi (1918–2018)” yubiley medalı təqdim olunub.
Daha sonra nümayəndə heyəti Azərbaycan Respublikası Prokurorluğunun Tarix Muzeyi ilə tanış olub, prokurorluq orqanlarının tarixi, inkişaf mərhələləri və müasir fəaliyyət istiqamətləri barədə ətraflı məlumat alıb.
