Elpress.az xəbər verir ki, Qaradağ rayonunda insan kapitalının inkişafı və müasir idarəetmə yanaşmalarına həsr olunmuş beynəlxalq elmi-praktik konfrans təşkil edilib.
Tədbirdə müxtəlif sahələr üzrə mütəxəssislər insan kapitalının inkişafı ilə bağlı elmi və peşəkar yanaşmalarını bölüşüblər.Konfransda süni intellektin geniş yayıldığı dövrdə liderlik modellərinin dəyişməsi, kouçinqin idarəetmədə tətbiqi, insan və süni intellekt arasında əməkdaşlıq, yeni nəsil əməkdaşların motivasiyası və təşkilatlarda kouçinq mədəniyyətinin yaradılması kimi mövzular müzakirə olunub. İştirakçılar üçün praktiki çalışmalar da keçirilib.Tədbir çərçivəsində panel müzakirələri ilə yanaşı, yerli və xarici mütəxəssislər, dövlət qurumlarının, elm və təhsil müəssisələrinin, sənaye və biznes sektorunun nümayəndələri arasında fikir mübadiləsi aparılıb. Görüşlər zamanı yeni əməkdaşlıq imkanları və birgə layihələr ətrafında müzakirələr keçirilib.Konfransın yekununda insan kapitalına investisiyanın, davamlı təhsilin, psixoloji dayanıqlılığın və peşəkar kouçinq yanaşmalarının əhəmiyyəti vurğulanıb. Süni intellektdən məsuliyyətli istifadənin də təşkilatların və cəmiyyətin inkişafına mühüm töhfə verə biləcəyi qeyd edilib.
Sonda konfransın məruzəçiləri və iştirakçılarına sertifikatlar təqdim olunub, xatirə şəkilləri çəkdirilib.
