Bir əsrlik elmi irsə həsr olunan böyük tədbir: Bakı Türk dünyasının mədəniyyət mərkəzinə çevrildi
Elpress.az-ın Apa.az-a istinadən verdiyi məlumata əsasən, Bakıda Birinci Türkoloji Qurultayın 100 illiyinə həsr olunan “Türk Dünyası Həftəsi”nin açılış mərasimi keçirilib.İyunun 29-da Heydər Əliyev Mərkəzində təşkil olunan tədbir Türk dünyasının elmi, mədəni və tarixi irsinin öyrənilməsi baxımından mühüm hadisə kimi qiymətləndirilib.Açılış mərasimində Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva Prezident İlham Əliyevin tədbir iştirakçılarına müraciətini səsləndirib.Qeyd olunub ki, “Türk Dünyası Həftəsi” Azərbaycan Prezidentinin Birinci Türkoloji Qurultayın 100 illik yubileyinin keçirilməsi ilə bağlı imzaladığı sərəncama uyğun olaraq təşkil edilib.1926-cı ildə ilk dəfə Bakıda keçirilən Birinci Türkoloji Qurultay türk xalqlarının elm, dil və mədəniyyət tarixində mühüm mərhələlərdən biri hesab olunur. Yubiley tədbirlərinin keçirilməsi təşəbbüsü 2025-ci ildə Qəbələdə keçirilən Türk Dövlətləri Təşkilatının Zirvə Görüşündə irəli sürülüb.Tədbirdə Türkiyə, Qazaxıstan, Qırğızıstan və Özbəkistan prezidentlərinin müraciətləri də təqdim olunub.Mədəniyyət naziri Adil Kərimli çıxışında bildirib ki, Azərbaycan Birinci Türkoloji Qurultayın irsinə böyük ehtiram göstərir və bu yubileyin dövlət səviyyəsində qeyd olunması Türk dünyasının ortaq elmi və mədəni dəyərlərinə verilən önəmin göstəricisidir.TDT-nin Baş katibi Kubanıçbek Ömüralıyev isə vurğulayıb ki, Birinci Türkoloji Qurultayın irəli sürdüyü ideyalar bu gün də Türk dövlətləri arasında əməkdaşlıq və inteqrasiya proseslərinin inkişafında mühüm rol oynayır.Tədbirdə çıxış edən Milli Məclis sədrinin müavini, akademik Rafael Hüseynov Birinci Türkoloji Qurultayın yalnız elmi toplantı deyil, həm də türk xalqlarının ortaq kimliyini və mədəni bağlarını nümayiş etdirən tarixi hadisə olduğunu qeyd edib.“Türk Dünyası Həftəsi” çərçivəsində elmi görüşlər, mədəni proqramlar və müxtəlif tədbirlər keçiriləcək. Proqram iyulun 3-dək davam edəcək və Şuşa, Xankəndi, Ağdam şəhərlərində də təşkil olunacaq.Tədbirlərdə 20 ölkədən 80-dən çox tanınmış türkoloq-alim və müxtəlif beynəlxalq təşkilatların nümayəndələri iştirak edir.
