Elpress.az xəbər verir ki, iyunun 27-də Azərbaycan Dövlət Milli Gənc Tamaşaçılar Teatrında görkəmli dramaturq Mirzə Fətəli Axundzadənin “Sərgüzəşti-mərdi-xəsis” komediyası əsasında hazırlanan “Hacı Qara” tamaşasının premyerası keçirilib.
Səhnə əsəri klassik komediyanın ruhu qorunmaqla, müasir teatr estetikası və dinamik səhnə həlli ilə tamaşaçılara təqdim olunub. Tamaşanın səhnə redaktəsinin müəllifi Dilsuz Mustafayev, quruluşçu rejissoru isə Xalq artisti Cənnət Səlimovadır.
Musiqi və rəqs elementləri ilə zəngin olan tamaşanın bəstəkarı Firudin Allahverdi, xoreoqrafı Gülməmməd Şahverdiyevdir. Tamaşanın quruluşçu rəssamı Elşən Sərxanoğlu, rejissoru Gülnar Hacıyeva, rejissor assistenti isə Sona Məhərrəmovadır.
Əsərin süjet xətti Heydər bəy və Sona xanımın sevgisi ətrafında cərəyan edir. Maddi sıxıntılar və müxtəlif maneələrlə üzləşən qəhrəmanlar dostluğun, sədaqətin və əsl sevginin puldan üstün olduğunu nümayiş etdirirlər.
Yeni səhnə həllində XIX əsrə aid süjetə fərqli yanaşma diqqət çəkir. Bəzi epizodlarda Azərbaycanın müasir tarixinin, xüsusilə də Qarabağ Zəfərinin ruhunun hiss olunması tamaşaya əlavə məna və emosional çalar qatır.
Səhnə əsərində Xalq artisti Yasin Qarayev, Əməkdar artistlər Elnur Hüseynov, Gülər Nəbiyeva, Nəsibə Eldarova, eləcə də bir sıra tanınmış aktyorlar çıxış edirlər.
Qeyd edək ki, “Hacı Qara” Milli Gənc Tamaşaçılar Teatrının cari mövsümdə son premyerasıdır. Klassik Azərbaycan dramaturgiyasının incilərindən sayılan bu əsərin yeni səhnə yozumunu tamaşaçılar növbəti teatr mövsümündə də izləyə biləcəklər.
