Hüquq fakültəsində Ağaoğlunun adına auditoriya da istifadəyə verilib
Elpress.az xəbər verir ki, Türkiyənin Ankara Universitetinin Hüquq fakültəsində Azərbaycan ictimai fikir tarixinin görkəmli nümayəndəsi Əhməd bəy Ağaoğlunun barelyefinin və onun adına yaradılan auditoriyanın açılışı keçirilib.Tədbirdə Ankara Universitetinin rektor müavini, professor Orhan Uzun, Azərbaycanın mədəniyyət nazirinin müavini Fərid Cəfərov, Azərbaycanın Türkiyədəki səfirliyinin və TÜRKSOY-un nümayəndələri, alimlər, ziyalılar və digər qonaqlar iştirak ediblər.Çıxışlarda Şuşada anadan olan Əhməd bəy Ağaoğlunun Azərbaycanın milli oyanışında, türk dünyasının ictimai və mədəni fikir tarixində, eləcə də təhsil, hüquq, mətbuat və modernləşmə sahələrindəki fəaliyyəti vurğulanıb.Bildirilib ki, 1925-ci ildə Ankarada yaradılan Hüquq məktəbinin təsisçilərindən biri olan Ağaoğlu burada müəllim kimi də fəaliyyət göstərib və Türkiyədə hüquq təhsilinin inkişafına töhfə verib.Tədbir zamanı Əhməd bəy Ağaoğlunun barelyefinin açılışı olub. Barelyef Azərbaycan Mədəniyyət Mərkəzinin sifarişi əsasında heykəltəraş Əlisəfa Əsgərov tərəfindən hazırlanıb.Daha sonra Mədəniyyət Mərkəzinin layihəsi əsasında yenilənən Əhməd bəy Ağaoğlu auditoriyası təqdim edilib. Auditoriyada onun Azərbaycan və Türkiyədəki həyat və fəaliyyətinə, elmi, hüquqi, ədəbi və publisistik irsinə həsr olunan xüsusi bölmələr yaradılıb.
