Azərbaycanın uğurlu “ASAN xidmət” modeli xaricdə tətbiq olunacaq: Kamboca təcrübədən yararlanmaq istəyir
Elpress.az-ın məlumatına əsasən, Kamboca Krallığı Azərbaycanın dövlət xidmətləri sahəsində uğurlu layihələrindən biri olan “ASAN xidmət” modelini öyrənmək və bu təcrübədən yararlanmaq niyyətindədir.Bu məqsədlə Kambocanın poçt və telekommunikasiyalar naziri Vandet Çeanın rəhbərlik etdiyi nümayəndə heyəti Azərbaycana səfər edib.Səfər 2025-ci ilin dekabrında Dövlət Agentliyi ilə imzalanmış Anlaşma Memorandumunun icrası çərçivəsində təşkil olunub. Əsas məqsəd “ASAN xidmət”in fəaliyyəti ilə yaxından tanış olmaq, dövlət xidmətlərinin təşkili sahəsində Azərbaycanın qabaqcıl təcrübəsini öyrənmək və bu modelin Kambocada tətbiqi imkanlarını müzakirə etməkdir.Nümayəndə heyəti əvvəlcə Zəfər abidəsini və Şəhidlər xiyabanını ziyarət edərək Azərbaycanın suverenliyi və ərazi bütövlüyü uğrunda həyatını itirən şəhidlərin xatirəsini ehtiramla yad edib.Daha sonra qonaqlar “ASAN xidmət” mərkəzində olublar. Dövlət Agentliyinin sədri Ülvi Mehdiyev Azərbaycanın innovativ dövlət xidmətləri modeli, vətəndaş məmnuniyyətinə əsaslanan yanaşma və rəqəmsal həllər barədə nümayəndə heyətinə məlumat verib.Görüş zamanı bildirilib ki, “ASAN xidmət” Azərbaycanın uğurlu intellektual brendlərindən birinə çevrilib və onun təcrübəsi dünyanın 30-dan çox ölkəsinin marağına səbəb olub.Kambocalı nazir Vandet Çean “ASAN xidmət” modelini yüksək qiymətləndirərək, bu təcrübənin ölkəsində tətbiqi üçün lazımi addımların atılacağını qeyd edib.Səfər çərçivəsində nümayəndə heyətinə dövlət xidmətlərinin dizaynı, məlumatlara əsaslanan idarəetmə mexanizmləri və innovativ yanaşmalarla bağlı təqdimatlar keçirilib.Qonaqlar həmçinin “INNOLAND” İnkubasiya və Akselerasiya Mərkəzi, “Bilim Bakı”, Səyyar ASAN xidmət, 108 Çağrı Mərkəzi və ASAN TV/Radio kimi qurumların fəaliyyəti ilə tanış olublar.
