İsraildə media turunda iştirak edən jurnalistlər Hurfeişdə druz icmasının nümayəndəsi ilə görüşüblər
Elpress.az xəbər verir ki, İsraildə təşkil olunan media turunda iştirak edən azərbaycanlı jurnalistlər ölkənin şimalında, Yuxarı Qalileya dağlarında yerləşən Hurfeiş druz şəhərinə səfər ediblər.Səfər çərçivəsində jurnalistlər İsraildə druz icmasının nümayəndəsi, Universal Sülh Şurası İnsan Hüquqları Təşkilatının sədri Şeyx doktor Kasem Baderlə görüşüblər.Görüş zamanı Bader İsraildə və regionun digər ölkələrində yaşayan druzların vəziyyəti, qarşılaşdıqları çətinliklər və müxtəlif ölkələrdəki icmalar arasında əlaqələr barədə danışıb.Onun sözlərinə görə, druzlar əsasən Suriya, Livan, İsrail və İordaniyada yaşayırlar. Uzun illər ərzində həmin ölkələrdəki siyasi vəziyyət və sərhəd məhdudiyyətləri səbəbindən bir çox druz ailələri öz yaxınları və qohumları ilə görüşmək imkanından məhrum olublar.Şeyx Kasem Bader qeyd edib ki, Suriya və Livanla sərhədlərin bağlı qalması druz icmaları arasında əlaqələrin inkişafına ciddi maneə törədir. İordaniya ilə sülh sazişindən sonra müəyyən imkanların yarandığını bildirən Bader, Suriya və Livandakı vəziyyətin isə druzların qarşılıqlı əlaqələrinə hələ də təsir etdiyini vurğulayıb.O, həmçinin druzların Yaxın Şərqdə azlıq icması kimi üzləşdiyi problemlərə toxunaraq, regionda sülh və sabitliyin təmin edilməsinin icmaların gələcəyi üçün mühüm əhəmiyyət daşıdığını bildirib.Jurnalistlər görüş zamanı druzların tarixi, mədəniyyəti, dini ənənələri və İsrail cəmiyyətində tutduqları mövqe barədə də məlumat əldə ediblər.Druzlar əsasən İsrail, Suriya, Livan və İordaniyada yaşayan, özünəməxsus dini və mədəni ənənələrə malik ərəb dilli icmadır. Onlar özlərini ayrıca dini icma hesab edir və inanclarını qapalı icma daxilində qoruyurlar. İsraildə druzlar sosial və ictimai həyatda fəal iştirak edir, həmçinin İsrail Müdafiə Qüvvələrində xidmət edirlər.
