Bakıda qobelen və tekstil sənətinə həsr olunmuş beynəlxalq müsabiqə-sərgi açılıb.
Elpress.az xəbər verir ki, “TOMA – Yaddaşın ilmələri: Xatirədən gələcəyə” adlı layihənin açılış mərasimi Şirvanşahlar Sarayında keçirilib. Sərgi Azərbaycan tekstil sənətinin görkəmli nümayəndəsi, professor Tamila Məmmədovanin xatirəsinə həsr olunub.Tədbiri açan İçərişəhər Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud bildirib ki, layihə sənətkarın irsinin yaşadılması və gələcək nəsillərə ötürülməsi baxımından mühüm əhəmiyyət daşıyır.Çıxış edən incəsənət tarixçisi və Polşanın Lodz şəhərindəki Mərkəzi Tekstil Muzeyinin baş kuratoru Marta Kovalevska və Litva Rəssamlar İttifaqının prezidenti Eglė Ganda Bogdanienė layihənin beynəlxalq əməkdaşlıq və sənət mübadiləsi baxımından önəmini vurğulayıblar.“Azərxalça” ASC-nin İdarə Heyətinin sədri Emin Məmmədov bildirib ki, müsabiqəyə 40-dan çox iştirakçı tərəfindən 150-dən artıq əsər təqdim olunub və işlər beynəlxalq münsiflər heyəti tərəfindən qiymətləndirilib.Layihə çərçivəsində qaliblərin mükafatlandırılması həyata keçirilib, həmçinin Tamila Məmmədovanın həyat və yaradıcılığına həsr olunmuş sənədli film nümayiş etdirilib.Təşkilatçıların sözlərinə görə, TOMA layihəsi qobeleni yalnız dekorativ sənət deyil, həm də müasir vizual mədəniyyətin bir hissəsi kimi təqdim edərək ənənə ilə müasirlik arasında körpü yaradır.
