Rusiyada törədildiyi bildirilən qətllə bağlı məhkəmədə dövlət ittihamçısı çıxış edib
Elpress.az xəbər verir ki, Rusiyada 2013-cü ildə törədildiyi bildirilən qətl hadisəsi ilə bağlı Azərbaycan vətəndaşları Elxan Xuduyev və Seymur Məmişovun cinayət işi üzrə məhkəmə istintaqı başa çatıb.Məhkəmədə dövlət ittihamçısı çıxış edərək hər iki təqsirləndirilən şəxsin 15 il müddətinə azadlıqdan məhrum edilməsini istəyib. İşə Bakı Ağır Cinayətlər Məhkəməsində hakim Eldar İsmayılovun sədrliyi ilə baxılır. Növbəti məhkəmə iclasının sentyabrın 16-da keçirilməsi nəzərdə tutulur.İttihama əsasən, hadisə 2013-cü il iyunun 25-də Rusiyada baş verib. İstintaqın qənaətinə görə, Elxan Xuduyev və Seymur Məmişov əvvəlcədən əlbir olaraq Rusiya vətəndaşı Azaliya Asanovanı boğaraq öldürüblər. Bildirilir ki, qətl başqa ağır cinayətin gizlədilməsi məqsədilə törədilib.Cinayət işi 2024-cü ilin dekabrında Rusiya tərəfi tərəfindən Azərbaycan Respublikasının Baş Prokurorluğuna göndərilib və araşdırmanın davam etdirilməsi Baş Prokurorluğun İstintaq İdarəsinə həvalə olunub.Toplanmış sübutlar əsasında bu il martın 5-də Xuduyev və Məmişov bir qrup şəxs tərəfindən və başqa cinayəti gizlətmək məqsədilə adam öldürməkdə ittiham olunaraq təqsirləndirilən şəxs qismində məsuliyyətə cəlb ediliblər.İstintaq orqanının vəsatəti əsasında hər iki şəxs barəsində həbs qətimkan tədbiri seçilib.
