Azərbaycan Milli Kitabxanasında “Türk Dünyası Milli Kitabxanaları” İctimai Birliyinin ilk toplantısı təşkil olunub. Tədbirdə gələcək əməkdaşlıq və birgə layihələr müzakirə edilib.
Elpress.az xəbər verir ki, İyulun 2-də Azərbaycan Milli Kitabxanasında “Türk Dünyası Milli Kitabxanaları” İctimai Birliyinin birinci toplantısı keçirilib. Tədbirdə Türk dünyası ölkələrinin milli kitabxanaları arasında əməkdaşlığın genişləndirilməsi, rəqəmsal layihələrin həyata keçirilməsi və 2026–2027-ci illər üzrə fəaliyyət istiqamətləri müzakirə olunub.Birliyin İdarə Heyətinin sədri, Azərbaycan Milli Kitabxanasının direktoru, professor Kərim Tahirov bildirib ki, iki il əvvəl yaradılması barədə qərar qəbul edilən birlik artıq rəsmi fəaliyyətə başlayıb. O, təşkilatın gələcəkdə daha da genişlənməsinin, digər türk dövlətlərinin də birliyə qoşulmasının və qurumun beynəlxalq təşkilat kimi qeydiyyata alınmasının əsas prioritetlərdən olduğunu vurğulayıb.Toplantının əsas müzakirə mövzularından biri Türk dünyasının ortaq elektron məlumat bazasının yaradılması olub. Təklifə əsasən, türk xalqlarının ortaq mədəni irsini əks etdirən rəqəmsal resurslar vahid platformada birləşdirilərək üzv ölkələrin istifadəsinə veriləcək.Türkiyə, Özbəkistan, Qazaxıstan, Qırğızıstan və Macarıstan milli kitabxanalarının rəhbərləri təşəbbüsü dəstəklədiklərini bildirərək müəllif hüquqlarının qorunması, elektron kataloqların inteqrasiyası, texniki standartların hazırlanması və rəqəmsal əməkdaşlığın genişləndirilməsi ilə bağlı təkliflərini səsləndiriblər.Toplantıda kitabxanaçılar arasında təcrübə mübadiləsi proqramlarının təşkili, ortaq internet saytının yaradılması, vahid oxucu bileti modelinin hazırlanması, qarşılıqlı ədəbiyyat bölmələrinin formalaşdırılması və Türk dünyasının görkəmli şəxsiyyətlərinin yubileylərinin birgə qeyd olunması kimi məsələlər də müzakirə edilib.Sonda səsləndirilən təkliflər əsasında 2026–2027-ci illər üzrə fəaliyyət planı təsdiqlənib, ortaq elektron məlumat bazasının yaradılması, birgə layihələrin həyata keçirilməsi və Birliyin təşkilati fəaliyyətinin gücləndirilməsi ilə bağlı müvafiq qərarlar qəbul edilib.
