Bakının Yasamal rayonunda yerləşən 98 saylı uşaq bağçasına gedən azyaşlının səhhətində və davranışında dəyişiklik müşahidə olunması ilə bağlı yayılan məlumatlar araşdırılır.
Elpress.az xəbər verir ki, sosial şəbəkələrdə yayılan iddialara əsasən, uşağın tibbi müayinələri zamanı qanında psixotrop dərman aşkarlanıb.
Ailə, Qadın və Uşaq Problemləri üzrə Dövlət Komitəsindən bildirilib ki, məsələ dərhal nəzarətə götürülüb. Azyaşlının valideynləri Komitəyə dəvət olunaraq onlardan ətraflı məlumat alınıb.
Faktın hərtərəfli və obyektiv araşdırılması, həmçinin uşağın hüquq və mənafelərinin qorunması məqsədilə Dövlət Komitəsi tərəfindən Daxili İşlər Nazirliyinə və Baş Prokurorluğa rəsmi müraciətlər göndərilib.
Hazırda aidiyyəti dövlət qurumları tərəfindən araşdırma və zəruri tədbirlər davam etdirilir. Araşdırmanın nəticələrinə uyğun olaraq qanunvericiliyə əsasən müvafiq tədbirlər görüləcək.
Qeyd edək ki, Bakı Şəhəri üzrə Təhsil İdarəsi də məsələ ilə bağlı araşdırma aparıldığını və hüquq-mühafizə orqanlarına müraciət edildiyini açıqlayıb.
