Rusiya zərbələri Ukraynanı alternativ ixrac marşrutlarından istifadə etməyə məcbur edir
Elpress.az xəbər verir ki, Rusiyanın Odessa vilayətindəki liman və ixrac infrastrukturlarına endirdiyi zərbələr nəticəsində Ukraynanın əsas dəniz limanlarının fəaliyyəti ciddi şəkildə məhdudlaşıb. Bu limanlar ölkənin ixracının böyük hissəsinin həyata keçirildiyi əsas logistika mərkəzləri hesab olunur.
Mövcud vəziyyət Ukraynanı yüklərin daşınması üçün alternativ marşrutlara yönəlməyə vadar edib. Hazırda yüklərin bir hissəsi daha aşağı yükgötürmə imkanlarına malik Dunay çayı üzərindəki Reni və İzmayıl limanlarına, eləcə də ölkənin qərb sərhədində yerləşən dəmir yolu keçidlərinə istiqamətləndirilir.
Limanların fəaliyyətinin dayanması Ukraynanın ixrac imkanlarına ciddi təsir göstərir. Məlumata görə, ölkənin əsas Qara dəniz limanları əvvəllər ixracın təxminən 90 faizini təmin edirdi.Bununla yanaşı, alternativ marşrutlarda da ciddi logistika problemləri yaranıb. Dunay limanlarına istiqamətlənən gəmilərin sayının artması nəticəsində Sulina kanalı yaxınlığında növbələr yaranıb, dəmir yolu ilə daşımalar isə davamlı hava hücumları və infrastruktura zərbələr səbəbindən çətinləşib.
