Azərbaycan Dəmir Yolları QSC (ADY) dəmir yolu infrastrukturunun təhlükəsizliyini təmin etmək məqsədilə xətlərin texniki vəziyyətini mütəmadi olaraq yoxlayır.
Elpress.az xəbər verir ki, müasir diaqnostika sistemləri ilə təchiz edilmiş xüsusi qatar vasitəsilə relslər arasındakı məsafə, relslərin səviyyəsi, şpallar və bərkidicilərin vəziyyəti nəzarətdə saxlanılır.
Elektrikləşdirilmiş xətlərdə kontakt şəbəkəsinin texniki vəziyyəti də xüsusi avadanlıqlar vasitəsilə yoxlanılır. Ultrasəs aşkarlama sistemi ilə təchiz edilmiş diaqnostika qatarı dəmir yolu infrastrukturuna ayda iki dəfə kompleks baxış keçirir.
Yoxlamalar zamanı hər hansı qüsur və ya uyğunsuzluq aşkarlandıqda, onun dəqiq yeri aidiyyəti mütəxəssislərə bildirilir. Daha sonra əraziyə baxış keçirilir və problemin xarakterindən asılı olaraq relslərin dəyişdirilməsi, xəttin həndəsi parametrlərinin bərpası, ballast qatının yenilənməsi və digər texniki işlər görülür.
ADY bildirir ki, diaqnostika qatarının fəaliyyəti mümkün nasazlıqların erkən mərhələdə aşkarlanmasına və operativ şəkildə aradan qaldırılmasına, nəticədə qatarların təhlükəsiz hərəkətinin təmin edilməsinə xidmət edir.
