Şəki Şəhər İcra Hakimiyyətinin sabiq şöbə müdiri Tural Məmmədovun cinayət işi üzrə məhkəmə prosesi yekunlaşıb. O, 9 il müddətinə azadlıqdan məhrum edilib.
Elpress.az APA-ya istinadən xəbər verir ki, Şəki Ağır Cinayətlər Məhkəməsində hakim Tural Əfəndizadənin sədrliyi ilə keçirilən prosesdə hökm elan olunub. Məhkəmə zərərçəkmiş şəxslərin mülki iddialarını da təmin edib və təqsirləndirilən şəxsin dəymiş ziyanı ödəməsi barədə qərar qəbul edib.
İttihama əsasən, Tural Məmmədov Şəki Şəhər İcra Hakimiyyətində Vətən müharibəsi iştirakçıları və şəhid ailələri ilə işin təşkili şöbəsinin müdiri vəzifəsində çalışarkən onlara müxtəlif vədlər verib. O, şəhid ailələrini və müharibə iştirakçılarını çoxmənzilli binalardan mənzillə təmin etməyə, eləcə də müharibə iştirakçılarının ailə üzvləri üçün işlə bağlı texniki avadanlıqlar əldə etməyə kömək edəcəyini bildirib.
İstintaq materiallarına görə, sabiq şöbə müdiri avtomobillə təmin olunmağa kömək edəcəyini vəd etməklə də həmin şəxslərdən müxtəlif məbləğlərdə pul alıb. Ona təkrar dələduzluq və külli miqdarda rüşvət alma ilə bağlı ittihamlar irəli sürülüb.
Tural Məmmədov Cinayət Məcəlləsinin 178.2.2, 178.2.3, 178.2.4, 311.3.2 və 311.3.3-cü maddələri ilə təqsirləndirilib.
