Bakı və bölgələrdə fövqəladə hallar zamanı davranış qaydaları izah edilib
Elpress.az xəbər verir ki, Fövqəladə Hallar Nazirliyinin aidiyyəti qurumları tərəfindən əhalinin fövqəladə hallar zamanı düzgün davranış qaydaları barədə məlumatlandırılması məqsədilə müxtəlif ərazilərdə silsilə maarifləndirmə tədbirləri keçirilib.FHN-in Bakı Regional Mərkəzinin təşkilatçılığı ilə paytaxtın bir sıra tibb müəssisələrində, Gəncə Regional Mərkəzi tərəfindən Gəncə və Daşkəsəndə, Sumqayıt Regional Mərkəzi tərəfindən Abşeron rayonunda, həmçinin digər regional mərkəzlərin əhatə etdiyi rayonlarda tədbirlər təşkil olunub.Maarifləndirmə görüşlərinə FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssisləri də cəlb ediliblər.Tədbirlər zamanı iştirakçılara təbii və texnogen xarakterli fövqəladə hadisələr, o cümlədən yanğın və zəlzələ zamanı görülməli tədbirlər barədə ətraflı məlumat verilib. Həmçinin FHN-in “112” qaynar xəttinin təyinatı izah olunub və ilkin yanğınsöndürmə vasitələrindən istifadə qaydaları praktiki şəkildə nümayiş etdirilib.Görüşlər interaktiv formatda keçirilib, iştirakçıların sualları cavablandırılıb və fövqəladə hallar zamanı təhlükəsiz davranışla bağlı zəruri tövsiyələr verilib.
