Azərbaycanda ekspertiza sahəsində icraata daxil olan işlərin sayında son illər ciddi artım qeydə alınıb.
Elpress.az xəbər verir ki, bunu ədliyyə naziri Fərid Əhmədov İTV-yə müsahibəsində deyib.
Nazirin sözlərinə görə, son 4 il ərzində icraata daxil olan işlərin sayı təxminən 45 faiz artıb. Bu isə ekspertiza sahəsində dövlətin üzərinə düşən iş yükünün əhəmiyyətli dərəcədə çoxalmasına səbəb olub.
F.Əhmədov bildirib ki, işlərin sayındakı artım ekspert rəylərinin keyfiyyətinə və onların vaxtında təqdim edilməsinə də təsir göstərə bilər.
Nazir qeyd edib ki, mövcud yükün optimallaşdırılması məqsədilə özəl ekspertiza institutunun formalaşdırılması və özəl ekspertlərin fəaliyyətə başlaması üçün şəhadətləndirmə prosesinə başlanılıb. Hazırda proses davam edir.
Onun sözlərinə görə, təlim mərhələsini başa vuran şəxslər seçim prosesindən keçdikdən sonra özəl ekspert kimi fəaliyyət göstərə biləcəklər.
