Dövlət İmtahan Mərkəzi (DİM) II və III ixtisas qrupları üzrə iyulun 5-də keçirilmiş qəbul imtahanının ən yüksək nəticələrini açıqlayıb. Məlumata görə, imtahanda ümumilikdə dörd abituriyent maksimal 400 bal toplayaraq ən yüksək nəticəyə imza atıb.
Elpress.az xəbər verir ki , II ixtisas qrupu üzrə 400 bal toplayan yeganə abituriyent Laçın rayon Oğuz tam orta məktəbinin məzunu İsbəndiyarlı Paşa Araz oğlu olub. O, qəbul imtahanının birinci mərhələsində 277,3 bal toplayıb. Hər iki mərhələnin yekun nəticəsinə əsasən isə II ixtisas qrupu üzrə ən yüksək göstərici 690 bal olmaqla Sumqayıt şəhər 35 nömrəli orta məktəbin məzunu Kərimov Zamin Ramin oğluna məxsusdur.III ixtisas qrupu üzrə isə üç nəfər – Sumqayıt şəhəri Təbiət Elmləri Təmayüllü Gimnaziyasının məzunu Məmmədzadə Əli Musa oğlu, Şəmkir rayonu Kür qəsəbə orta məktəbinin məzunu Məmmədova Aydan İxtiyar qızı və Abşeron rayonu Saray qəsəbə 1 nömrəli orta məktəbinin məzunu Mənsimli Orxan Zaur oğlu maksimum 400 bal toplayıblar.DİM-in açıqlamasına əsasən, III ixtisas qrupu üzrə hər iki mərhələnin cəminə görə ən yüksək nəticəni isə 689,6 bal toplayan Məmmədzadə Əli Musa oğlu göstərib.Qeyd edək ki, qəbul imtahanının birinci mərhələsində maksimum 300, ikinci mərhələsində isə 400 bal toplamaq mümkündür. Müsabiqə hər iki mərhələdə əldə olunan balların cəmi əsasında aparılır.
