Kiyevdən Brüsselə yeni müraciət: Ukrayna müdafiə xərcləri üçün milyardlarla avro tələb edir
Elpress.az-ın məlumatına əsasən, Ukrayna Avropa İttifaqından (Aİ) müdafiə ehtiyacları üçün 6,6 milyard avro həcmində hərbi dəstək tələb edib.Məlumata görə, Kiyev bu müraciəti Avropa Sülh Fondu vasitəsilə hərbi yardımın maliyyələşdirilməsi məqsədilə edib. Ukraynanın müdafiə naziri Mixaylo Fedorov tərəfindən göndərilən məktubda ölkənin artan müdafiə xərcləri ilə bağlı ehtiyaclar qeyd olunub.Bildirilib ki, Ukrayna büdcəsi ümumi həcmi 136 milyard avro olan müdafiə xərclərinin yalnız 53 milyard avroluq hissəsini qarşılaya bilir. Bu səbəbdən Avropa tərəfdaşlarından əlavə maliyyə dəstəyi istənilir.Avropa Komissiyasının sədri Ursula fon der Lyayen isə Ukraynaya dronların alınması üçün nəzərdə tutulan 6 milyard avroluq yardım paketinin köçürülməsinə başlanıldığını açıqlayıb. Onun sözlərinə görə, bu vəsaitin ilk 3,9 milyard avroluq hissəsi artıq ayrılıb.Ukraynanın yeni maliyyə tələbi Avropa İttifaqının Kiyevə hərbi və maliyyə dəstəyinin davam etdirilməsi istiqamətində müzakirələrin əsas mövzularından biri olaraq qalır.
