Bu gün Cəbrayıl şəhərinin işğaldan azad edilməsindən 6 il ötür. 2020-ci il oktyabrın 4-də Prezident, Ali Baş Komandan İlham Əliyevin xalqa müraciəti ilə Azərbaycan xalqına uzun illər gözlədiyi tarixi müjdə çatdırıldı.
Elpress.az xəbər verir ki, 44 günlük Vətən müharibəsinin ən mühüm mərhələlərindən biri məhz 4 oktyabr 2020-ci ildə yaşandı. Həmin gün Cəbrayıl şəhəri və rayonun 9 kəndi işğaldan azad edildi.
İllərlə doğma torpaqlarından ayrı düşən Cəbrayıl sakinləri üçün bu xəbər sadəcə hərbi uğur deyil, böyük qayıdışın başlanğıcı idi. Prezident İlham Əliyev həmin gün xalqa müraciətində Cəbrayılın azad olunmasını Azərbaycan xalqını təbrik edərək elan etdi.
Cəbrayılın azadlığı müharibənin ilk həftəsində rayon mərkəzinin düşməndən geri alınması baxımından xüsusi əhəmiyyət daşıyırdı. Prezident İlham Əliyev sonrakı çıxışlarında da bu Qələbənin Azərbaycan Ordusuna əlavə güc və inam verdiyini vurğulayıb.
Cəbrayıl 1993-cü il avqustun 23-də işğal edilmiş, əhalisi doğma yurdlarından didərgin salınmışdı. 2020-ci il oktyabrın 4-də isə Azərbaycan Ordusunun uğurlu əməliyyatları nəticəsində şəhər azadlığına qovuşdu.
Həmin gün Prezidentin səsləndirdiyi bir cümlə isə yaddaşlara əbədi həkk olundu: “Cəbrayıl bizimdir!”
Bu gün 4 oktyabr ölkənin rəsmi təqvimində Cəbrayıl Şəhəri Günü kimi qeyd edilir. Tarixi Qələbədən sonra rayonda genişmiqyaslı bərpa və quruculuq işləri aparılır, keçmiş məcburi köçkünlərin öz doğma yurdlarına qayıdışı təmin edilir.
4 oktyabr həm Cəbrayılın azadlıq günü, həm də 44 günlük Vətən müharibəsinin gedişində Azərbaycanın Qələbəyə aparan yolunda mühüm dönüş nöqtələrindən biri kimi tariximizdə yaşayır.
