Türkiyənin nəqliyyat və infrastruktur naziri Abdulkadir Uraloğlu bildirib ki, tikintisi davam edən Qars-İğdır-Aralık-Dilucu dəmir yolu layihəsi regionda nəqliyyat əlaqələrinin inkişafına mühüm töhfə verəcək.
Elpress.az xəbər verir ki, Türkiyənin nəqliyyat və infrastruktur naziri Abdulkadir Uraloğlu tikintisi davam edən Qars-İğdır-Aralık-Dilucu dəmir yolu layihəsinin Türkiyə, Azərbaycan və Ermənistan arasında dəmir yolu əlaqələrinin möhkəmləndirilməsinə mühüm töhfə verəcəyini bildirib.Nazirin sözlərinə görə, bu layihə Türkiyə üçün strateji əhəmiyyət daşıyır və ölkənin nəqliyyat siyasətində prioritet istiqamətlərdən biri hesab olunur. O vurğulayıb ki, nəqliyyat layihələri təkcə infrastrukturun inkişafına deyil, həm də istehsalın, ixracın, məşğulluğun, regional inkişafın və beynəlxalq əməkdaşlığın genişlənməsinə xidmət edir.Abdulkadir Uraloğlu qeyd edib ki, son 24 il ərzində Türkiyənin nəqliyyat və infrastruktur sektoruna ümumilikdə 355 milyard dollar həcmində investisiya yatırılıb. Onun sözlərinə görə, bu investisiyalar ölkənin dəmir yolu sisteminin sürətli inkişafına ciddi təkan verib.Nazir bildirib ki, 2002-ci ildə Türkiyənin dəmir yolu şəbəkəsinin uzunluğu təxminən 11 min kilometr olduğu halda, hazırda bu göstərici 14 min kilometrə çatıb. Bunun 2251 kilometri yüksəksürətli dəmir yolu xətlərindən ibarətdir. Məqsəd 2028-ci ilə qədər şəbəkənin uzunluğunu 17 min 287 kilometrə, 2053-cü ilə qədər isə 28 min 590 kilometrə çatdırmaqdır. Hazırda ölkədə 4164 kilometrlik yeni dəmir yolu xəttinin tikintisi davam etdirilir.Uraloğlu əlavə edib ki, hökumətin planına əsasən, 2028-ci ilə qədər yüksəksürətli dəmir yolu şəbəkəsinin əhatə etdiyi əyalətlərin sayı 11-dən 27-yə, əsas logistika mərkəzlərinin sayı isə 13-dən 25-ə yüksələcək.
