ABŞ Prezidenti Donald Tramp İranın nüvə proqramı ilə əlaqələndirilən Pikaks dağına mümkün hücum barədə danışıb. O, belə bir əməliyyatın cəmi bir saat ərzində həyata keçirilə biləcəyini bildirib.
Elpress.az xəbər verir ki, Tramp bu fikirləri “Fox News” telekanalına müsahibəsində səsləndirib.
ABŞ lideri daha əvvəl “Gecəyarısı çəkici” əməliyyatı ilə İranın nüvə obyektlərinə zərbələr endirildiyini xatırladıb. O, mümkün növbəti hədəf kimi Pikaks dağını göstərərək bunun mürəkkəb əməliyyat olmayacağını iddia edib.
Tramp Tehranın nüvə silahına sahib olmasını qəbuledilməz hesab etdiyini vurğulayıb. Bununla yanaşı, Vaşinqtonun İranla müharibə aparmadığını, danışıqların davam etdiyini bildirib. Onun sözlərinə görə, hazırkı danışıqlarda İran əlverişsiz mövqedədir.
Qeyd edək ki, Pikaks dağı İranın nüvə proqramı ilə əlaqələndirilən, yeraltı infrastrukturun yerləşdiyi ehtimal olunan ərazilərdən biri kimi gündəmə gəlib. Tehran həmin ərazidə nüvə fəaliyyəti ilə bağlı iddiaları rədd edir.
