Elpress.az xəbər verir ki, Banqladeşdə qızılca epidemiyası ilə bağlı vəziyyət ağır olaraq qalır. Son 24 saat ərzində daha dörd uşağın həyatını itirməsi ilə ölkədə bu xəstəlikdən ölənlərin sayı 712-yə yüksəlib.
Xarici medianın yaydığı məlumata görə, son bir gündə daha 941 şübhəli yoluxma faktı qeydə alınıb. Bununla da ölkədə qızılca ilə bağlı şübhəli halların ümumi sayı 99 min 207-yə çatıb.
Banqladeş Səhiyyə Nazirliyinin açıqlamasına əsasən, aprelin 10-dan etibarən qızılca şübhəsi ilə xəstəxanalara yerləşdirilən şəxslərin sayı 82 min 844 olub. Onlardan 79 min 152 nəfər müalicə aldıqdan sonra evə buraxılıb.
Artan yoluxma və ölüm halları fonunda Banqladeş hökuməti aprelin 7-də ölkə üzrə genişmiqyaslı təcili peyvənd kampaniyasına start verib. Səlahiyyətli qurumlar əhalini, xüsusilə də uşaqların vaxtında peyvənd olunmasının vacibliyi barədə xəbərdar edir.
Mütəxəssislərin sözlərinə görə, qızılca pnevmoniya və ensefalopatiya kimi ağır fəsadlara səbəb ola bilər və bu xəstəlik dünyada peyvənd vasitəsilə qarşısı alına bilən ölüm səbəbləri arasında ön sıralarda yer alır.
