Elpress.az xəbər verir ki, avqustun 12-də baş verəcək Günəş tutulması Avropada günəş enerjisi istehsalının müvəqqəti azalmasına səbəb olacaq.
Ayın Günəşin qarşısından keçməsi nəticəsində fotovoltaik elektrik enerjisi istehsalında əhəmiyyətli azalma gözlənilir. Açıq hava şəraitində Avropada günəş enerjisi istehsalının 9,7 QVt-a qədər azalacağı proqnozlaşdırılır.
Mütəxəssislərin hesablamalarına görə, bu dəyişiklik elektrik enerjisi sistemində qısa müddətli, lakin əvvəlcədən proqnozlaşdırılan azalma yaradacaq.Günəş tutulmasının təsirinin xüsusilə İspaniya və Almaniyada daha çox hiss olunacağı gözlənilir.
Elektrik ötürücü sistem operatorlarının isə mümkün dəyişikliklərə qarşı qabaqlayıcı tədbirlər gördüyü bildirilir.
Məlumata görə, enerji istehsalındakı dəyişiklik Bakı vaxtı ilə saat 21:15-dən 23:30-dək müşahidə oluna bilər.Qeyd edək ki, avqustun 12-də baş verəcək Günəş tutulması Azərbaycandan müşahidə olunmayacaq. Şamaxı Astrofizika Rəsədxanasının məlumatına əsasən, tutulma Bakı vaxtı ilə saat 19:34-də başlayacaq, maksimum faza saat 21:46-da çatacaq və 23:57-də başa çatacaq.
