Elpress.az xəbər verir ki, Azərbaycanda avtomobil sənayesində yeni layihəyə start verilib.“Limitless Drive” layihəsi çərçivəsində JAECOO J8 modeli 30 gün ərzində 7/24 rejimində ümumilikdə 30 min kilometr məsafə qət edərək uzunmüddətli sürüş testindən keçiriləcək.
Layihənin məqsədi avtomobilin fasiləsiz və uzunmüddətli istismar şəraitində imkanlarını real yol şəraitində nümayiş etdirməkdir. Test müddətində JAECOO J8-in yanacaq və enerji sərfiyyatı, dözümlülüyü, uzunmüddətli istismara davamlılığı və digər texniki göstəriciləri sınaqdan keçiriləcək.
Layihə çərçivəsində avtomobil Bakı şəhəri və Azərbaycanın müxtəlif regionlarını əhatə edən əvvəlcədən müəyyənləşdirilmiş marşrut üzrə hərəkət edəcək.Maraqlı məqamlardan biri isə test prosesinin izləyicilər üçün də açıq olmasıdır. Layihənin gedişatı sosial media platformalarında 7/24 rejimində izlənilə biləcək.
Avtomobilin keçdiyi marşrut, gündəlik nəticələr və sınağın gedişi barədə məlumatlar mütəmadi paylaşılacaq.Bundan əlavə, layihə müddətində müxtəlif viktorinalar, interaktiv müsabiqələr və xüsusi aktivliklərin keçirilməsi, qaliblərə isə sponsorlar tərəfindən hədiyyələrin təqdim olunması nəzərdə tutulur.
Qeyd edək ki, “Limitless Drive” layihəsinin rəsmi təqdimatı ilə bağlı Bakıda mətbuat konfransı keçirilib. Tədbirdə layihənin məqsədləri, formatı və 30 günlük sürüş testinin əsas mərhələləri barədə media nümayəndələrinə məlumat verilib.
Mətbuat konfransında iMotors şirkətinin direktoru Əli Əhədov, layihənin rəhbəri Kənan Əli və layihənin aparıcısı Eygün Xidirov iştirak ediblər.
