Azərbaycanda turizm sahəsində fəaliyyət göstərən mikro və kiçik sahibkarlıq subyektlərinə, o cümlədən qonaq evlərinə dövlət dəstəyi göstərilməsi planlaşdırılır.
Elpress.az Report-a istinadən xəbər verir ki, bu məsələ “Turizmin inkişafına dair 2026–2030-cu illər üçün Dövlət Proqramı”nın layihəsində öz əksini tapıb.Dövlət Turizm Agentliyindən bildirilib ki, layihədə turizm sektorunda fəaliyyət göstərən mikro və kiçik sahibkarlıq subyektlərinə dəstək tədbirlərinin həyata keçirilməsi nəzərdə tutulur.
Qeyd olunub ki, Dövlət Proqramının layihəsi hazırda aidiyyəti üzrə son razılaşma mərhələsindədir. Proqram təsdiqləndikdən sonra nəzərdə tutulan dəstək mexanizmləri barədə daha ətraflı məlumat veriləcək.Hazırda kənd qonaq evlərinin dəstəklənməsi istiqamətində müxtəlif mexanizmlər tətbiq olunur. Bunlardan biri “Turistik kənd” layihəsidir.Layihə çərçivəsində kənd qonaq evlərinin müvafiq avadanlıqlarla təmin edilməsi, yerli əhalinin turizm fəaliyyətinə cəlb olunması və özünüməşğulluq imkanlarının genişləndirilməsi hədəflənir.
Bildirilib ki, özünüməşğulluq proqramının “Aqroturizm” zərfi üzrə indiyədək 12 kənd qonaq evi müvafiq avadanlıqlarla təmin edilib.Onlardan 2-si Qusar rayonunun Laza, 3-ü Qax rayonunun Sarıbaş, 6-sı İlisu, 1-i isə Qəbələ rayonunun Duruca kəndində yerləşir.
Qeyd olunub ki, bu dəstək kəndlərdə turizm potensialından daha səmərəli istifadəyə, qonaq evlərinin xidmət imkanlarının və keyfiyyətinin yüksəldilməsinə, həmçinin regionlarda sahibkarlıq və özünüməşğulluğun artırılmasına şərait yaradır.
