Berlin hadisə ilə bağlı Moskvanı məsul tutmağa və yeni sanksiyalar tətbiq etməyə hazırlaşır
Elpress.az xəbər verir ki, Almaniya hökumətinin Leypsiq-Halle hava limanında baş verən dron insidentinə görə Rusiyaya qarşı tədbirlər görməyi nəzərdən keçirdiyi bildirilir.“Politico”nun məlumatına görə, Berlin partlayıcı maddə ilə təchiz olunduğu bildirilən dronun hava limanında aşkarlanması ilə bağlı Rusiyanı məsul tərəf elan etməyə və bu ölkəyə qarşı əlavə sanksiyalar tətbiq etməyə hazırlaşır. Məlumatın mənbələri məsələ ilə tanış olan üç Almaniya rəsmisidir.Nəşr yazır ki, Almaniyanın mümkün addımları Avropa İttifaqı çərçivəsində hazırlanmaqda olan yeni sanksiya paketi ilə eyni vaxtda həyata keçirilə bilər. Kansler Fridrix Mertsin məsələ ilə bağlı mövqeyini yaxın günlərdə, Aİ xarici işlər nazirlərinin İrlandiyada keçiriləcək qeyri-rəsmi toplantısından əvvəl açıqlaması gözlənilir.Almaniya hökumətindən isə bildirilib ki, hadisənin kim tərəfindən törədildiyi ilə bağlı yekun qərar yalnız istintaqın nəticələri tam qiymətləndirildikdən sonra veriləcək. Rusiya tərəfi insidentdə iştirakını rədd edir.ABŞ kəşfiyyatının ilkin qiymətləndirməsində dronun Rusiya hərbi kəşfiyyatı ilə əlaqəli ola biləcəyi bildirilib. Hadisə ilə bağlı Almaniyanın Federal Baş Prokurorluğu tərəfindən də araşdırma aparılır.Bu arada Aİ-nin Rusiyaya qarşı yeni sanksiyalar paketi üzərində işi davam etdirdiyi qeyd olunur. Paketə yüzlərlə fiziki və hüquqi şəxsin daxil edilməsinin nəzərdən keçirildiyi, yeni məhdudiyyətlərin oktyabrda qəbul edilə biləcəyi bildirilir. Rusiya dövlət aktivlərinin istifadəsi məsələsinin də yenidən gündəmə gətirildiyi vurğulanır.
