Yevlaxda azyaşlı oğluna ağır xəsarətlər yetirməkdə və onun ölümünə səbəb olmaqda təqsirləndirilən İlhamə Camal qızına hökm oxunub.
Elpress.az xəbər verir ki, Şəki Ağır Cinayətlər Məhkəməsində keçirilən prosesdə 1991-ci il təvəllüdlü qadın 9 il 6 ay müddətinə azadlıqdan məhrum edilib.
İstintaq materiallarına əsasən, ana azyaşlı oğlunun ağlamasına əsəbiləşərək onun bədəninin müxtəlif nahiyələrinə zərbələr endirib. Daha sonra uşağı əlləri ilə yuxarı qaldıraraq hündürlükdən taxta döşəməyə çırpıb. Xəstəxanaya yerləşdirilən Məhəmməd beş gün sonra vəfat edib.
Məhkəmədə əməlini etiraf edən qadın uşağı öldürmək niyyətinin olmadığını, onu ağladığı üçün cəzalandırmaq istədiyini bildirib.
O, ifadəsində əvvəllər rəsmi nikah olmadan dörd dəfə ailə qurduğunu və bu münasibətlərdən altı övladının dünyaya gəldiyini deyib. Qadın uşaqlarını doğulduqdan qısa müddət sonra atalarının uzaq qohumlarına verdiyini, hazırda onların harada yaşadıqlarını bilmədiyini və adlarını belə xatırlamadığını söyləyib.
