Kreml Trampın Rusiya-Ukrayna arasında enerji obyektlərinə qarşı hücumların dayandırılması təklifini dəstəkləyib
Elpress.az xəbər verir ki, Moskva ABŞ Prezidenti Donald Trampın Rusiya ilə Ukrayna arasında enerji sahəsində atəşkəs əldə olunması ilə bağlı təşəbbüsünü müsbət qiymətləndirir.Kremlin sözçüsü Dmitri Peskov bildirib ki, Rusiya Trampın bu istiqamətdəki açıqlamasından xəbərdardır və Moskva uzun müddətdir münaqişənin sülh yolu ilə həllinin tərəfdarıdır.Peskovun sözlərinə görə, neft emalı müəssisələrinin təhlükəsiz fəaliyyətinin təmin edilməsi qlobal neft məhsulları bazarında mövcud problemlərin tam həlli üçün kifayət deyil.O qeyd edib ki, əsas məsələlərdən biri neft məhsullarının ixracına tətbiq edilən məhdudiyyətlərdir. Peskov enerji təchizatına qarşı sanksiyaların aradan qaldırılmasının dünya bazarında neft məhsullarının həcmini artıraraq qiymətlərin azalmasına şərait yarada biləcəyini bildirib.Kremlin nümayəndəsi əlavə edib ki, Rusiya daxili bazarın neft məhsulları ilə təmin olunması üçün tədbirlər görür və enerji obyektlərinin təhlükəsizliyinin təmin edilməsi istiqamətində kompleks iş aparılır.
