Azərbaycan Prezidenti İlham Əliyev oktyabrın 14-də Özbəkistan Prezidenti Şavkat Mirziyoyevlə görüşüb.
Elpress.az xəbər verir ki, görüşdə iki ölkə arasında strateji tərəfdaşlıq və müttəfiqlik münasibətlərinin inkişaf perspektivləri nəzərdən keçirilib.
İlham Əliyev avqust ayında Özbəkistana etdiyi dövlət səfərini xatırladaraq, həmin səfər çərçivəsində əldə olunan razılaşmaların icrası və əməkdaşlığın daha da dərinləşdirilməsi imkanlarının müzakirə olunduğunu bildirib.
Şavkat Mirziyoyev isə Azərbaycanın inkişafını qardaş Özbəkistan xalqının məmnunluqla qarşıladığını qeyd edib. O, Azərbaycanın AQEM-ə sədrliyini və təşkilatın Zirvə Görüşünə ev sahibliyi etməsini ölkənin beynəlxalq nüfuzunun göstəricisi kimi qiymətləndirərək İlham Əliyevi təbrik edib.
Görüşdə ilin əvvəlindən iki ölkə arasında ticarət dövriyyəsinin artması müsbət hal kimi vurğulanıb. Energetika, investisiya, tikinti, nəqliyyat-logistika, yüngül sənaye, geologiya və turizm sahələrində birgə layihələrin həyata keçirilməsi, eləcə də mədəni-humanitar əlaqələrin inkişafı diqqət mərkəzində olub.
Dövlət başçıları, həmçinin beynəlxalq və regional gündəlikdəki məsələlər ətrafında fikir mübadiləsi aparıblar.
