Bakıda Ukraynanın aparıcı ali təhsil müəssisələrinin iştirakı ilə genişmiqyaslı təhsil sərgisi təşkil olunub.
Elpress.az xəbər verir ki, tədbir Ukrayna Təhsil və Elm Nazirliyinin Ukrayna Dövlət Beynəlxalq Təhsil Mərkəzi və Ukraynanın Azərbaycandakı Səfirliyinin birgə təşkilatçılığı ilə Hyatt Regency otelində baş tutub.
Beynəlxalq Hüquq və Beynəlxalq Əlaqələr Cəmiyyəti İB-nin sədr müavini, “Alijanov Group” MMC-nin direktoru, hüquq üzrə fəlsəfə doktoru Fürqan Abdullazadənin sözlərinə görə, sərgidə Ukraynanın 24 ali təhsil müəssisəsi təmsil olunub.
İştirakçılar universitetlərin təhsil proqramları, qəbul qaydaları, Erasmus+ akademik mobillik imkanları və beynəlxalq ikili diplom proqramları barədə ətraflı məlumat əldə ediblər.“Alijanov Group” MMC-nin təsisçisi Nəsib Alicanov bildirib ki, tədbirin rəsmi açılışında diplomatik korpusun nümayəndələri, təhsil sahəsinin təmsilçiləri, ali məktəb rəhbərləri, abituriyentlər və valideynlər iştirak ediblər.
Sərgi çərçivəsində ziyarətçilər universitet nümayəndələri ilə birbaşa görüşərək onları maraqlandıran suallara cavab almaq imkanı qazanıblar.“INGEK” Beynəlxalq Təhsil Mərkəzinin rəhbəri Rüfət Mirzəyev isə qeyd edib ki, tədbirdə Ukraynada təhsil almaq istəyən əcnəbi tələbələr üçün nəzərdə tutulmuş rəqəmsal qəbul sistemi də təqdim olunub.
Bildirilib ki, bu sistem qəbul prosesinin daha şəffaf, sadə və əlçatan şəkildə həyata keçirilməsinə xidmət edir.
Qeyd olunub ki, sərgi Azərbaycan gənclərinin Ukraynada ali təhsil imkanları ilə yaxından tanış olmasına, eyni zamanda iki ölkə arasında təhsil sahəsində əməkdaşlığın və beynəlxalq akademik əlaqələrin inkişafına mühüm töhfə verib.
