Elpress.az xəbər verir ki, Azərbaycanda səfərdə olan Xorvatiya Respublikası Müdafiə Nazirliyinin nümayəndə heyəti Milli Müdafiə Universitetinin tabeliyində fəaliyyət göstərən hərbi təhsil müəssisələrini ziyarət edib.
Nümayəndə heyətinin tərkibində Xorvatiya Müdafiə Nazirliyinin Müdafiə Akademiyasının dekanı, polkovnik Goran Huljev, “Katarina Zrinska” adına Xarici Dillər Mərkəzinin direktoru İrina Prifi Duriç və digər rəsmilər yer alıblar.Səfər çərçivəsində qonaqlar Milli Müdafiə Universitetinin tabeliyində fəaliyyət göstərən Hərbi İdarəetmə İnstitutunda və Heydər Əliyev adına Hərbi İnstitut keçirilən görüşlərdə iştirak ediblər.
Görüşlər zamanı Azərbaycan və Xorvatiya arasında hərbi təhsil sahəsində əməkdaşlığın genişləndirilməsi, hərbi kadr hazırlığı, qarşılıqlı təcrübə mübadiləsi və gələcək birgə layihələrin həyata keçirilməsi imkanları ətrafında fikir mübadiləsi aparılıb.
Xorvatiyalı qonaqlara hər iki ali hərbi təhsil müəssisəsinin fəaliyyəti, tədris prosesi, maddi-texniki bazası və mövcud infrastruktur barədə ətraflı məlumat təqdim olunub. Onlar tədris korpusları və digər obyektlərlə də yaxından tanış olublar.
Səfər çərçivəsində tərəflər hərbi təhsil sisteminin təşkili, müasir tədris yanaşmaları və bu sahədə tətbiq olunan yeniliklərə dair təqdimatlarla çıxış edib, qarşılıqlı maraq doğuran məsələlər ətrafında müzakirələr aparıblar.
