Ankarada keçirilən NATO sammiti çərçivəsində Böyük Britaniyanın Baş naziri Keir Starmer və Norveçin Baş naziri Jonas Gahr Støre İngiltərə–Norveç oyunu öncəsi zarafatyana dialoqla diqqət çəkiblər.
Elpress.az xəbər verir ki, NATO sammiti çərçivəsində baş tutan görüş zamanı hər iki ölkənin hökumət başçıları milli komandalarının formalarında bir araya gələrək səmimi söhbət ediblər. Görüşün görüntüləri Norveçin Baş naziri Jonas Gahr Støre tərəfindən “X” sosial şəbəkəsində paylaşılıb.Söhbət zamanı Støre 1981-ci ildə Norveçin İngiltərə üzərində qazandığı yaddaqalan qələbəni xatırladaraq, həmin oyundan sonra səslənən məşhur radio şərhini zarafatla yada salıb. Bu eyhama cavab olaraq Keir Starmer İngiltərənin indiyədək yeganə dünya çempionluğunu 1966-cı ildə, Leyboristlər Partiyasının hakimiyyətdə olduğu dövrdə qazandığını vurğulayaraq, bu dəfə də uğurun onların tərəfində olacağına inandığını bildirib.Səmimi və yumor dolu söhbətin sonunda hər iki lider qarşıdakı oyunun maraqlı keçəcəyini qeyd edib, bir-birlərinə uğurlar arzulayıblar.Qeyd edək ki, İngiltərə ilə Norveç arasında keçiriləcək dünya çempionatının 1/4 final qarşılaşması iyulun 12-də, saat 01:00-da start götürəcək.
