Azərbaycan Hərbi Hava Qüvvələrinin aviasiya bölmələrində 2026-cı ilin hazırlıq planına uyğun növbəti təlim-məşq uçuşları icra olunub.
Elpress.az xəbər verir ki, Müdafiə Nazirliyinin yaydığı məlumata görə, uçuşlardan əvvəl pilotların sağlamlıq vəziyyəti yoxlanılıb, təhlükəsizlik qaydaları üzrə təlimatlandırma aparılıb və aviasiya texnikasına baxış keçirilib. Təlim proqramına əsasən “JF-17C” (Block-III), “Su-25ML”, “Su-25” və “L-39” tipli təyyarələrlə praktiki uçuşlar yerinə yetirilib.
Pilotlar fərdi və qrup şəklində müxtəlif taktiki tapşırıqları icra edib, hava məkanında qarşılıqlı fəaliyyət, şərti döyüş əməliyyatları, hədəflərin aşkar edilərək məhv edilməsi və xüsusi hallarda operativ qərar qəbuletmə bacarıqlarını təkmilləşdiriblər.
Təlimlər zamanı əsas diqqət müxtəlif meteoroloji və taktiki şəraitdə döyüş tapşırıqlarının dəqiq və təhlükəsiz yerinə yetirilməsinə, həmçinin aviasiya vasitələrinin döyüş imkanlarının artırılmasına yönəldilib.
