Çexiyanın paytaxtı Praqada dünya şöhrətli müğənni və bəstəkar Müslüm Maqomayevin xatirəsinə həsr olunmuş “Sonetlər sevginin sinonimləridir” adlı musiqi-poeziya gecəsi keçirilib.
Lapidarium Qalereyasında təşkil olunan tədbirdə Maqomayevə həsr edilmiş soneti Çexiyadakı “Natəvan” Cəmiyyətinin və Praqa Azərbaycan Mədəniyyət Evinin rəhbəri, şairə Leyla Begim Cəfərova səsləndirib. Həmin əsər sənətkarın 75 illik yubileyi münasibətilə Düsseldorf və Bakıda keçirilən tədbirlərdə də təqdim olunub.
Gecənin musiqi proqramında beynəlxalq Antonin Dvorjak və Avropa Qustav Mahler mükafatlarının laureatı, skripkaçı Aleksandr Şonert çıxış edib. Onun “Melodiya” əsərini skripkada ifa etməsi tədbirin yaddaqalan məqamlarından biri olub. Natalya Şonert fortepiano ifaları ilə musiqi proqramına töhfə verib.
Tədbirdə jurnalist və yazıçı Boris Qoldberq, eləcə də aktrisa və şair Nataliya Volkova da öz sonetlərindən parçalar təqdim ediblər.
Poeziya və klassik musiqinin bir araya gəldiyi gecə Müslüm Maqomayevin sənət irsinə ehtiramın ifadəsi olub.
