Azərbaycanın Xalq artisti, tanınmış müğənni Zaur Rzayev 74 yaşında dünyasını dəyişib.
Elpress.az xəbər verir ki, bu barədə “Report”a sənətçinin oğlu Azər Rzayev məlumat verib.
Sənətçi Mərkəzi Neftçilər Xəstəxanasında müalicə alırdı. Oktyabrın 27-də onun vəziyyətinin kritik-ağır olduğu bildirilmişdi.
Zaur Rzayev 1952-ci il yanvarın 28-də anadan olub. O, Bakı Kitabxanaçılıq Texnikumunda, Asəf Zeynallı adına Musiqi Texnikumunda və Azərbaycan Dövlət Konservatoriyasının vokal şöbəsində təhsil alıb.
Uzun illər Azərbaycan Silahlı Qüvvələrinin Mahnı və Rəqs Ansamblında solist və bədii rəhbər kimi fəaliyyət göstərən sənətçi Azərbaycan musiqi mədəniyyətinin tanınmış nümayəndələrindən biri olub.
Zaur Rzayev 1998-ci ildə Əməkdar artist, 2003-cü ildə Xalq artisti, 2008-ci ildə isə Dağıstan Respublikasının Xalq artisti fəxri adlarına layiq görülüb.
