Prezident İlham Əliyev “Daşınmaz Əmlakın Elektron Reyestri və Kadastrı” informasiya sistemi haqqında Əsasnaməni təsdiq edib.
Elpress.az xəbər verir ki, bununla bağlı dövlət başçısı oktyabrın 28-də Fərman imzalayıb.
Sənədə əsasən, sistemin sahibi funksiyalarını İqtisadiyyat Nazirliyi yanında Əmlak Məsələləri Dövlət Xidməti, operator funksiyalarını isə onun tabeliyindəki “Daşınmaz Əmlakın Dövlət Kadastrı və Reyestri” publik hüquqi şəxsi həyata keçirəcək.
Fərmana görə, İqtisadiyyat Nazirliyi 18 ay müddətində müvafiq qurumların informasiya ehtiyatlarında saxlanılan sənəd və məlumatların sistemə daxil edilməsini, eləcə də torpaqların elektron kadastr uçotu informasiya sistemindəki məlumatların yeni sistemə köçürülməsini təmin etməlidir.
Bundan başqa, DERKİS-in “Hökumət buludu”nda yerləşdirilməsi, təkmilləşdirilməsi və müvafiq dövlət informasiya reyestrlərinə daxil edilməsi üçün zəruri tədbirlər görüləcək. Rəqəmsal İnkişaf və Nəqliyyat Nazirliyi də aidiyyəti qurumlarla birlikdə məlumatların Elektron Hökumət İnformasiya Sistemi vasitəsilə ötürülməsini təmin etmək üçün tədbirlər görməlidir.
