Tacikistanın paytaxtı Düşənbə şəhərində 28 May – Müstəqillik Günü münasibətilə Azərbaycanın səfirliyinin təşkilatçılığı ilə rəsmi qəbul baş tutub.
Elpress.az AZƏRTAC-a istinadən xəbər verir ki, tədbirdə Tacikistanın hökumət və parlament nümayəndələri, diplomatik korpus üzvləri, işgüzar dairələrin təmsilçiləri və bu ölkədə yaşayan azərbaycanlılar iştirak ediblər.Mərasim Azərbaycan və Tacikistanın dövlət himnlərinin səsləndirilməsi ilə başlayıb. Daha sonra Azərbaycanın Tacikistandakı səfiri Əlimirzamin Əskərov çıxış edərək Azərbaycan Xalq Cümhuriyyətinin yaranma tarixindən və onun Şərqdə ilk demokratik respublika kimi əhəmiyyətindən danışıb.Diplomat müstəqilliyin bərpasından sonra Azərbaycanın keçdiyi inkişaf yoluna toxunaraq, ölkənin siyasi, iqtisadi və beynəlxalq mövqeyinin möhkəmləndiyini bildirib. O, son illərdə əldə olunan uğurlar, həyata keçirilən iri layihələr və Azərbaycanın qlobal tədbirlərə ev sahibliyi etməsi barədə məlumat verib.Səfir çıxışında Vətən müharibəsi və sonrakı dövrdə ölkənin ərazi bütövlüyünün təmin olunmasını, işğaldan azad edilmiş ərazilərdə aparılan yenidənqurma işlərini də diqqətə çatdırıb. Həmçinin mina təhlükəsi və itkin düşmüş şəxslərlə bağlı məsələlər barədə tədbir iştirakçılarına məlumat verilib.Tədbir çərçivəsində Azərbaycan-Tacikistan münasibətlərini əks etdirən sərgi nümayiş olunub, ölkəmizin tarixi, mədəniyyəti və inkişafını əks etdirən videoçarxlar təqdim edilib.Mərasimin bədii hissəsində Tacikistanın tanınmış opera ifaçılarından biri tərəfindən Azərbaycan musiqi nümunələri səsləndirilib. Qonaqlara milli mətbəximizin müxtəlif təamları da təqdim olunub.
