Səbinə Əliyeva Azərbaycanda saxlanılan erməni əsilli şəxslərə qarşı dini ayrı-seçkilik və işgəncə iddialarını əsassız adlandırıb
Elpress.az xəbər verir ki, Azərbaycan Ombudsmanı Səbinə Əliyeva Ermənistanda səsləndirilən və Azərbaycanda saxlanılan erməni əsilli şəxslərin dini mənsubiyyətlərinə görə ayrı-seçkiliyə və işgəncəyə məruz qalması ilə bağlı iddialara münasibət bildirib.Ombudsman bu ittihamları əsassız və qərəzli qiymətləndirib. Onun sözlərinə görə, etibarlı sübut təqdim edilmədən ağır ittihamların ictimaiyyətə fakt kimi təqdim olunması insan hüquqlarının müdafiəsi prinsiplərinə uyğun deyil.Səbinə Əliyeva dini və etnik mənsubiyyətin cinayət məsuliyyəti ilə əlaqələndirilməsinin yolverilməz olduğunu vurğulayıb. Bildirilib ki, şəxsin məsuliyyətə cəlb olunması onun etnik və ya dini mənsubiyyətinə deyil, törətdiyi əməlin xarakterinə, toplanmış sübutlara və məhkəmənin hüquqi qiymətləndirməsinə əsaslanır.Ombudsmanın Milli Preventiv Qrupu tərəfindən müxtəlif vaxtlarda keçirilən monitorinqlər zamanı Azərbaycanda saxlanılan erməni əsilli şəxslərlə görüşlər keçirildiyi, onların tibbi və psixoloji vəziyyətlərinin qiymətləndirildiyi bildirilib. Monitorinqlər zamanı həmin şəxslərin hüquqlarının ayrı-seçkiliyə yol verilmədən təmin olunduğu, tibbi yardım və digər zəruri xidmətlərə çıxışlarının olduğu qeyd edilib.Ombudsman həmçinin insan hüquqları ilə bağlı açıqlamaların siyasi məqsədlərdən uzaq və yoxlanılmış faktlara əsaslanmasının vacibliyini diqqətə çatdırıb. Onun fikrincə, təsdiqlənməmiş məlumatların dini müstəvidə təqdim olunması cəmiyyətlər arasında etimadı zəiflədə və Azərbaycan-Ermənistan sülh prosesinə mənfi təsir göstərə bilər.Səbinə Əliyeva davamlı sülhün təmin olunması üçün qarşıdurma və nifrət ritorikasından çəkinməyin, obyektiv və məsuliyyətli yanaşmanın vacib olduğunu vurğulayıb.
