ABŞ Prezidenti Donald Tramp Ukrayna müharibəsinin başa çatdırılması və uzunmüddətli sülh razılaşmasının əldə olunması istiqamətində səylərini davam etdirir.
Elpress.az xəbər verir ki, bu barədə ABŞ Prezidentinin xüsusi nümayəndəsi Stiv Uitkoff “X” sosial şəbəkəsində paylaşım edib.
Uitkoff bildirib ki, qarşıda görüləsi mühüm işlər qalsa da, Tramp müharibəyə son qoymaq və gələcək nəsillərin təhlükəsizliyini təmin edəcək davamlı razılaşmaya nail olmaq niyyətindədir.
Bu açıqlama Vaşinqtonun Ukrayna müharibəsinin nizamlanması istiqamətində diplomatik təmasları intensivləşdirdiyi vaxt səslənib. Oktyabrın 21-də Uitkoff Rusiyanın Sankt-Peterburq şəhərində Prezident Vladimir Putinlə görüşərək münaqişənin həlli ilə bağlı təklifləri müzakirə edib. Bundan əvvəl isə Norveçin paytaxtı Osloda Ukrayna Prezidenti Volodimir Zelenski və Avropa nümayəndələri ilə danışıqlar aparılıb.
Məlumatlara görə, tərəflər arasında sülh təşəbbüslərinin irəlilədilməsi istiqamətində müzakirələr davam edir. Bununla belə, müharibənin dayandırılması üçün yekun razılaşmanın əldə olunması hələ qarşıda duran əsas vəzifələrdən biridir.
