Gürcüstan hökuməti ötən il ərzində regionda sabitliyin möhkəmləndirilməsi və davamlı sülhün təmin olunmasına yönəlmiş balanslı qonşuluq siyasəti həyata keçirdiyini bəyan edib.
Elpress.az APA-ya istinadən xəbər verir ki, bu barədə Gürcüstanın Baş naziri İrakli Kobaxidzenin illik hesabatında qeyd olunub.Sənəddə bildirilib ki, Gürcüstanı Azərbaycan, Türkiyə və Ermənistan ilə möhkəm strateji tərəfdaşlıq əlaqələri birləşdirir. Vurğulanıb ki, Azərbaycan və Türkiyə ilə əməkdaşlıq mövcud strateji layihələr vasitəsilə daha da inkişaf etdirilir.Hesabatda qeyd edilib ki, hər üç qonşu ölkə Gürcüstanın əsas ticarət tərəfdaşları sırasında yer alır və onlarla yüksək səviyyəli siyasi dialoq davam etdirilir.Sənəddə həmçinin Gürcüstan–Türkiyə–Azərbaycan üçtərəfli əməkdaşlıq formatının əhəmiyyətinə toxunulub. Bildirilib ki, xarici işlər və müdafiə nazirlərinin görüşləri, eləcə də biznes forumları çərçivəsində əməkdaşlıq genişləndirilir.Hesabat dövründə keçirilən yüksək səviyyəli görüşlər və qarşılıqlı səfərlər zamanı Gürcüstanın Azərbaycan və Ermənistanla dövlət sərhədlərinin delimitasiya və demarkasiyası məsələlərinin də müzakirə olunduğu vurğulanıb.Qeyd edək ki, illik hesabat artıq Gürcüstan parlamentinə təqdim edilib. Baş nazir İrakli Kobaxidzenin iyunun sonunda sənədlə bağlı deputatlar qarşısında çıxış edəcəyi gözlənilir.
