Psixiatriya yardımı ilə bağlı qanunvericilik yenilənir: hüquqi boşluqlar aradan qaldırılacaq
Psixi pozuntusu olan şəxslərin məcburi psixiatriya müayinəsi ilə bağlı yeni qaydalar təklif edilir“Psixiatriya yardımı haqqında” qanuna dəyişiklik layihəsi psixiatriya yardımı sahəsində mövcud hüquqi boşluqların aradan qaldırılması, tibbi müdaxilələrin hüquqi əsaslarının dəqiqləşdirilməsi və bu sahədə qaydaların daha da təkmilləşdirilməsi məqsədi daşıyır.Milli Məclisin Səhiyyə komitəsinin iclasında qanun layihəsinin müzakirəsi zamanı parlamentin Sosial qanunvericilik şöbəsinin müdiri Adil Vəliyev bildirib ki, təklif olunan dəyişikliklər psixi pozuntusu olan şəxslərin və ətrafındakı insanların təhlükəsizliyinin təmin edilməsinə yönəlib.Yeni dəyişikliklərə əsasən, psixiatriya yardımının gecikdirilməsi şəxsin özünün və ya digər insanların həyat və sağlamlığı üçün təhlükə yarada biləcəyi hallarda, həmin şəxsin və ya onun qanuni nümayəndəsinin razılığı olmadan psixiatriya müayinəsinə aparılması mümkün olacaq.Bu zaman prokurorun və Daxili İşlər Nazirliyinin inzibati araşdırma aparan səlahiyyətli şəxsinin qərarı psixiatriya müayinəsinin həyata keçirilməsi üçün əsaslardan biri kimi müəyyən ediləcək.
