Astrofiziklərin proqnozuna əsasən, iyunun son günlərində Yerə zəif və orta səviyyəli geomaqnit təsirlər gözlənilir. Bununla belə, güclü maqnit qasırğası proqnozlaşdırılmır.
Mütəxəssislərin beynəlxalq heliofizika mərkəzlərinin məlumatları əsasında hazırladığı proqnoza görə, Günəş küləyinin təsiri nəticəsində geomaqnit sahəsində müəyyən dəyişikliklər baş verəcək.
Bildirilib ki, geomaqnit aktivliyi ən yüksək həddə 26 və 27 iyun tarixlərində çatacaq. Həmin günlərdə Kp indeksi 3,7 səviyyəsində olacaq ki, bu da orta dərəcəli geomaqnit pozuntusu hesab edilir. Ən çox təsirin səhər və axşam saatlarında hiss olunacağı qeyd olunur.
Elpress.az xəbər verir ki, İyunun 28-də maqnitosferin tədricən sakitləşəcəyi və Kp indeksinin 3-ə enəcəyi gözlənilir. 29-30 iyun tarixlərində isə Günəş aktivliyi daha da azalacaq və geomaqnit sahəsi sakit vəziyyətdə qalacaq.
Mütəxəssislər vurğulayırlar ki, 3,7 bal kritik göstərici sayılmır və əksər sağlam insanlar bu dəyişiklikləri hiss etməyə bilər. Lakin meteohəssas şəxslər, yaşlılar, hamilə qadınlar və ürək-damar xəstəliklərindən əziyyət çəkən insanlarda baş ağrısı, halsızlıq, yuxu pozuntuları, təzyiq dəyişiklikləri və əsəbilik kimi hallar müşahidə oluna bilər.
Həkimlər geomaqnit aktivliyi günlərində qəhvə, energetik və spirtli içkilərin qəbulunu azaltmağı, daha çox su içməyi, kifayət qədər yatmağı və açıq havada yüngül gəzintilər etməyi tövsiyə edirlər. Bundan başqa, günün ən isti saatlarında uzun müddət birbaşa günəş altında qalmaq məsləhət görülmür.
